ఫార్ములా ఈ-కార్ రేసు కేసులో ప్రధాన నిందితుడిగా ఆరోపణలు ఎదుర్కొంటున్న బీఆర్ఎస్ వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్) ఈ రోజు ఎన్ఫోర్స్మెంట్ డైరెక్టరేట్ (ఈడీ) విచారణకు హాజరయ్యారు. ఉదయం 10:30 గంటలకు ఈడీ కార్యాలయానికి చేరుకున్న కేటీఆర్ను ఏడు గంటలకు పైగా ప్రశ్నించినట్టు సమాచారం.
ఆరోపణలపై ఈడీ కఠిన విచారణ
ఫార్ములా ఈ-కార్ రేసు నిర్వహణలో అనుమానాస్పదంగా జరిగిన ఫైనాన్షియల్ లావాదేవీలపై ఈడీ అధికారులు కేటీఆర్ను ప్రశ్నించారు. ప్రధానంగా అడిగిన ప్రశ్నలు:
విదేశీ కంపెనీకి కేబినెట్ అనుమతి లేకుండానే రూ. 45 కోట్లు బ్రిటన్ పౌండ్ల రూపంలో చెల్లించడంపై వివరణ.
నిధుల బదలాయింపులో ఫారిన్ ఎక్స్చేంజ్ మేనేజ్మెంట్ యాక్ట్ (ఫెమా) ఉల్లంఘనపై వివరాలు.
రెండో సీజన్లో హెచ్ఎండీఏను పార్ట్నర్గా ఎందుకు చేర్చారన్న అంశం.
మొదటి సీజన్లో ఉన్న ఏస్ నెక్స్ట్ సంస్థను ఎందుకు తప్పించారు?
హెచ్ఎండీఏ నుంచి నిధుల బదిలీ ప్రక్రియపై లోతైన విచారణ.
ఈ విచారణలో కేటీఆర్ అధికారులకు తన వాదనను వివరించినట్టు సమాచారం. మధ్యాహ్న భోజన విరామం అనంతరం మరింత లోతుగా ప్రశ్నించారని తెలుస్తోంది.
అరెస్టు ఊహాగానాలు – కానీ ఇంటికి పంపిన ఈడీ
కేటీఆర్ను ఈడీ అధికారులు అరెస్ట్ చేసే అవకాశం ఉందని ఊహాగానాలు వ్యాప్తి చెందాయి. అయితే విచారణ పూర్తయిన తర్వాత కొన్ని ఫార్మాలిటీలను పూర్తి చేయాల్సి ఉందని అధికారులు తెలిపారు. కేటీఆర్ ఇచ్చిన స్టేట్మెంట్లపై ఆయన సంతకాలు చేసిన తర్వాత, ఈడీ ఆయనను ఇంటికి పంపింది.
ఈడీ కార్యాలయం వద్ద ఉద్రిక్తత వాతావరణం
కేటీఆర్ విచారణ నేపథ్యంలో బీఆర్ఎస్ శ్రేణులు భారీగా ఈడీ కార్యాలయం వద్ద చేరుకుని కేటీఆర్కు మద్దతుగా నినాదాలు చేశారు. పోలీసులు గట్టి బందోబస్తును ఏర్పాటు చేశారు. కేటీఆర్ బయటకు వచ్చిన అనంతరం ఆయన అనుచరులు పెద్ద ఎత్తున నినాదాలు చేశారు.
కేటీఆర్ స్పందన
ఈడీ విచారణ ముగిసిన తర్వాత కేటీఆర్ మీడియాతో మాట్లాడే అవకాశం ఉంది. తనపై లేవనెత్తిన ఆరోపణలు రాజకీయ కుతంత్రాలేనని, తాను చట్టపరంగా సహాయ సహకారాలు అందిస్తానని చెప్పే అవకాశం ఉంది.
ఈ కేసు ఇంకా విచారణ దశలో ఉన్నందున, ఈడీ మరోసారి కేటీఆర్ను ప్రశ్నించే అవకాశముందని సమాచారం.
About the Author
