ఏపీ భవిష్యత్ ఈ పర్యటనపై ఆధారపడి ఉంది
ఈ పర్యటన విజయవాడ పర్యటన కంటే మిన్నగా జరగాలి
మంత్రి నారా లోకేష్
ప్రధాని పర్యటనకు పటిష్ట ఏర్పాట్లు చేయండి
మంత్రి నారా లోకేష్ ఆధ్వర్యంలో మంత్రుల బృందం అధికారులను, ప్రజాప్రతినిధులను దిశానిర్దేశం
ప్రధాని పర్యటన నేపథ్యంలో విశాఖ కలెక్టరేట్ లో సమీక్షా సమావేశం
విశాఖపట్నం: విద్య, ఐటీ శాఖల మంత్రి నారా లోకేష్ జనవరి 8న విశాఖలో జరగనున్న ప్రధాన మంత్రి నరేంద్ర మోడీ పర్యటనను విజయవంతం చేయాలని మిషన్ మోడ్‌లో పనిచేయాలని అధికారులకు, ప్రజాప్రతినిధులకు పిలుపునిచ్చారు. ఎన్డీయే ప్రభుత్వం ఏర్పడిన తర్వాత మొట్టమొదటి సారి ప్రధాని ఏపీకి వస్తున్నారని, ఇది చరిత్రాత్మక పర్యటన అని పేర్కొన్నారు. అందరూ ఒకే ఆజెండాతో పని చేయాలని, గతంలో ఎన్నడూ జరగని విధంగా ఈ పర్యటనను విజయవంతం చేయాలని కోరారు. అందుకు సంబంధించి అధికారులు, కూటమి నేతలు తమ బాధ్యతలను తీసుకోవాలని చెప్పారు.
ప్రధాని పర్యటన కోసం పటిష్ట ఏర్పాట్లను తీసుకోవడానికి విశాఖ కలెక్టరేట్ లో ఉన్నతాధికారులు, కూటమి ప్రజాప్రతినిధులతో సమీక్షా సమావేశం నిర్వహించారు. ఈ సమావేశంలో ప్రధాని పర్యటనలో ఎలాంటి అవాంఛనీయ సంఘటనలు చోటుచేసుకోకుండా పటిష్ట ఏర్పాట్లు చేయాలని మంత్రుల బృందం అధికారులకు, ప్రజాప్రతినిధులకు సూచించింది.
ప్రధాని పర్యటన రాష్ట్రానికి కీలకమైనది
ఈ సందర్భంగా మంత్రి నారా లోకేష్ వ్యాఖ్యానించారు – “ప్రధానమంత్రి పర్యటన రాష్ట్ర భవిష్యత్‌కు అత్యంత కీలకమైంది. ఏపీ అభివృద్ధికి ప్రధానమంత్రి మోడీ అతి పెద్ద మద్దతుగా నిలుస్తున్నారు. ఆయన కేటాయించిన పలు ప్రాజెక్టులు, నిధులు ఏపీకే మాత్రమే ఇవ్వబడ్డాయి.” రాష్ట్ర అభివృద్ధి వేగంగా జరుగేందుకు కేంద్ర మద్దతు అవసరమని, ఇది కేవలం ఉత్తరాంధ్రకు సంబంధించిన పర్యటన కాదు, పూరా ఆంధ్రప్రదేశ్ భవిష్యత్ కోసం జరగనున్న పర్యటన అని తెలిపారు.
“ప్రధాని పర్యటన విజయవంతం కావాలి అంటే మనం బూత్ స్థాయిలో మానిటరింగ్ చేసి, ఈ కార్యక్రమం ఘనంగా జరగాలి. విజయవాడలో జరిగిన రోడ్ షో కంటే మిన్నగా ఉండాలి,” అని మంత్రి నారా లోకేష్ చెప్పారు.
సింగిల్ బారికేడ్ల ఏర్పాటు
ప్రధాని రోడ్ షోకి సంబంధించిన ఏర్పాట్లలో ప్రజలకు ఇబ్బందులు రాకుండా సింగిల్ బారికేడ్లు ఏర్పాటు చేయాలని మంత్రుల బృందం పోలీసు ఉన్నతాధికారులకు సూచించింది. ప్రజలు ఎంతమంది తరలివచ్చినా ఎలాంటి ఆంక్షలు లేకుండా అందరినీ అనుమతించాలని సూచించారు. రోడ్ షో, బహిరంగ సభల నిర్వహణ కోసం ప్రజాప్రతినిధులకు, అధికారులకు బాధ్యతలు అప్పగించారు.
బహిరంగ సభకు 3 లక్షల మంది హాజరు
ప్రధానమంత్రి బహిరంగ సభకు ఉత్తరాంధ్ర, తూర్పుగోదావరి జిల్లాల నుంచి సుమారు 3 లక్షల మంది హాజరయ్యే అవకాశం ఉంది. అందుకు తగినట్లుగా వసతులు, భోజన సదుపాయాలు కల్పించాలని మంత్రుల బృందం ఆదేశించింది. జనసమీకరణ, పార్కింగ్, పాస్‌ల పంపిణీ వంటి అంశాలను కూడా సమీక్షలో చర్చించారు.
బహిరంగ సభ స్థలాన్ని పరిశీలించిన మంత్రుల బృందం
జనవరి 8న ఏయూ ఇంజనీరింగ్ కళాశాల మైదానంలో జరగనున్న బహిరంగ సభ స్థలాన్ని మంత్రి నారా లోకేష్ నేతృత్వంలో మంత్రుల బృందం పరిశీలించింది. ప్రాంగణాన్ని మొత్తం పరిశీలించి, అధికారులకు పలు సూచనలు చేశారు. ఈ సమీక్షా సమావేశంలో కూటమి ప్రజాప్రతినిధులు, నాయకులు, ఉన్నతాధికారులు పాల్గొన్నారు.
Journalism is our Passion