హైదరాబాద్‌: బీఆర్ఎస్ ఎమ్మెల్సీ కవిత ఇప్పటికే ఢిల్లీ మద్యం పాలసీ కేసులో జైలుకు వెళ్లి వచ్చారని, ఫార్ములా ఈ-కార్ రేసులో కేటీఆర్ కూడా జైలుకు వెళతారని కాంగ్రెస్ నేత, ఎమ్మెల్యే కడియం శ్రీహరి సంచలన వ్యాఖ్యలు చేశారు. కేసీఆర్ కుటుంబం నిజాయితీపరులైతే ఒక్కొక్కరిపై అన్ని కేసులు ఎందుకు ఉన్నాయని ప్రశ్నించారు.
2014లో బీఆర్ఎస్ అధికారంలోకి రాకముందు కేసీఆర్ కుటుంబ ఆస్తులు ఎంత? ఇప్పుడు ఎంత? అని ప్రశ్నిస్తూ, పదేళ్లలో వేల కోట్ల ఆస్తులు ఎలా సంపాదించారో తెలపాలని డిమాండ్ చేశారు. ముఖ్యంగా కాళేశ్వరం ప్రాజెక్ట్‌లో కేసీఆర్, హరీశ్ రావు అనేక తప్పులు చేశారని ఆరోపించారు.
దళితబంధు, రైతుబంధు పథకాల అమలులో కూడా భారీ అవినీతి జరిగిందని విమర్శించారు. దళితబంధు పథకంలో కమిషన్లు తీసుకుంటూ ఇప్పుడు నీతులు చెబుతుండడం విడ్డూరమని ఎద్దేవా చేశారు. తాను చేసిన ఆరోపణలు సత్యమేనని, తప్పు నిరూపిస్తే దేనికైనా సిద్ధమని కడియం శ్రీహరి సవాల్ చేశారు. ఆధారాలు లేకుండా ఆరోపణలు చేయడం మానుకోవాలని అధికార పార్టీకి హితవు పలికారు.