Hareesh

నాగచైతన్య, సాయిపల్లవి జంటగా నటిస్తున్న ‘తండేల్‌’ చిత్రం ప్రాజెక్ట్‌ ప్రకటించిన దగ్గర నుంచి ప్రేక్షకుల్లో అమితమైన ఆసక్తిని రేకెత్తిస్తోంది. శ్రీకాకుళం జిల్లాలోని మత్య్యకారుల జీవితాల ఆధారంగా రూపొందుతున్న ఈ సినిమా, యథార్థ ఘటనల స్ఫూర్తితో రూపొందిన కథనాన్ని తెరపై ఆవిష్కరించనుంది. జాలరుల జీవిత పోరాటాలు, దేశభక్తిని ప్రధానాంశాలుగా తీసుకుని దర్శకుడు చందు మొండేటి ఈ సినిమాను తెరకెక్కిస్తున్నారు.

పాన్‌ ఇండియా విడుదల

‘తండేల్‌’ సినిమాను ఫిబ్రవరి 7న పాన్‌ ఇండియా స్థాయిలో విడుదల చేయనున్నారు. తెలుగు సినిమా విభిన్న కథాంశాలను ప్రపంచస్థాయికి చేర్చే ప్రయత్నంలో ఈ సినిమా ఒక మైలురాయిగా నిలుస్తుందని చిత్రబృందం ఆశాభావం వ్యక్తం చేసింది.

మ్యూజిక్‌ అద్భుతాలు

ఇప్పటికే విడుదలైన ‘బుజ్జి తల్లి..’ పాట ప్రేక్షకులను ఆకట్టుకుని మ్యూజిక్‌ ఛార్ట్‌లలో అగ్రస్థానంలో కొనసాగుతోంది. ఈ గీతం జాలరుల జీవితంలోని భావోద్వేగాలను అద్భుతంగా చిత్రీకరించడంతో పాటు, దేవిశ్రీప్రసాద్‌ స్వరాల మాయాజాలంతో మక్కువ పెంచింది.

‘శివశక్తి..’ పాట ప్రత్యేకత

రెండో గీతం ‘శివశక్తి..’ ను డిసెంబర్‌ 22న వారణాసి ఘాట్స్‌లో ప్రత్యేకంగా విడుదల చేయనున్నారు. ఈ పాట విజువల్‌గా శ్రీకాకుళం సాంస్కృతిక వారసత్వం, శ్రీముఖలింగం శివాలయ విశిష్టతలను ఆవిష్కరించనుంది. జాతరల ఆధ్యాత్మిక శోభను ప్రతిబింబించే ఈ గీతం, ప్రేక్షకులను విశేషంగా ఆకట్టుకుంటుందని చిత్ర బృందం తెలిపింది. శేఖర్‌ మాస్టర్‌ ఈ పాటకు ప్రత్యేకమైన కొరియోగ్రఫీ అందించారు.